ជប៉ុន៖ លោក Akira Toriyama ដែលជាអ្នកបង្កើតសៀវភៅត្លុក និងគំនូរជីវចលដ៏ល្បីល្បាញ Dragon Ball បានទទួលមរណភាពហើយកាលពីថ្ងៃទី១ ខែមីនាកន្លងទៅ ក្នុងវ័យ ៦៨ឆ្នាំ។ នៅលើបណ្ដាញសង្គម X ផ្លូវការនៃ Dragon Ball បានបង្ហោះសំណេរមួយនៅថ្ងៃនេះដែលមានខ្លឹមសារថា៖ "យើងមានសេចក្តីសោកស្ដាយយ៉ាងខ្លាំងក្នុងការជូនដំណឹងដល់អ្នកទាំងអស់គ្នាឱ្យបានដឹងថា អ្នកបង្កើតសាច់រឿង Dragon Ball Manga លោក Akira Toriyama បានទទួលមរណភាពនៅថ្ងៃទី០១ ខែមីនា ដោយសារស្ថានភាពនៃជំងឺខួរក្បាលស្រួចស្រាវ"។
គួរឱ្យដឹងថា សាច់រឿង Dragon Ball គឺជាចំណងជើងគំនូរជីវចលដែលមានការគាំទ្រខ្លាំងបំផុត និងលក់ដាច់បំផុត និងមានភាពល្បីល្បាញយ៉ាងខ្លាំងក្នុងវិស័យគំនូរជីវចល និងសៀវភៅ Manga របស់ប្រទេសជប៉ុន។ សាច់រឿង Dragon Ball នេះត្រូវបានប្រកាសចេញដំបូងបង្អស់កាលពីឆ្នាំ១៩៨៤ ហើយក្រោយមកត្រូវបានផលិតជាសៀវភៅត្លុក ខ្សែភាពយន្តភាគ និងភាពយន្តដុំ ព្រមទាំងផលិតជាវីដេអូហ្គេមជាច្រើនហូរហែរបន្តបន្ទាប់ផងដែរ។
ក្នុងភាពក្រៀមក្រំនេះដែរ លោក Eiichiro Oda ដែលជាអ្នកបង្កើតសិទ្ធិផ្តាច់មុខរឿងតុក្កតា One Piece ដ៏ធំមួយរបស់ប្រទេសជប៉ុនដែរនោះ ក៏បានចូលរួមរំលែកទុក្ខចំពោះមរណភាពរបស់លោក Toriyama ហើយបានពិពណ៌នាថា មរណភាពរបស់គាត់គឺភ្លាមៗពេក ហើយពិបាកនឹងមានអ្នកមកជំនួសតំណែងរបស់លោកណាស់។ លោក Oda និយាយថា៖ "ខ្ញុំគិតថា ខ្ញុំមិនអាចជួប (មនុស្សដូចជា) គាត់ម្តងទៀតទេ ខណៈនេះខ្ញុំពិតជាពោរពេញដោយភាពក្រៀមក្រំ និងភាពសោកសៅយ៉ាងខ្លាំង"៕
